ನೀನೆಂದೂ ನಿಜವಾದ ನನ್ನ ನೋಡೇ ಇಲ್ಲ...!!

 ಮೂರು ವರ್ಷದ ಹಿಂದಿನ ಮಾತು.. ಒಂದು ದಿನ ನಾನು ನಿನ್ನ ಫೋಟೋವನ್ನು ಫೇಸ್​ಬುಕ್​ನಲ್ಲಿ ನೋಡಿದ್ದೆ.. ಮೊದಲ ನೋಟಕ್ಕೆ ನೀನು ಇಷ್ಟವೂ ಆಗಿದ್ದೆ.. ಅದೇನೋ ಕ್ರಶ್​ ಅಂತಾರಲ್ಲ, ಅದಾಗಿತ್ತು ಅನಿಸುತ್ತೆ.. ನಿನ್ನ ಫೋಟೋವನ್ನು ಇನ್ನಷ್ಟು ಸುಂದರಗೊಳಿಸಿ ನಿನಗೇ ಕಳುಹಿಸಿಕೊಟ್ಟೆ.. ನಿನಗೂ ಇಷ್ಟವಾಗಿತ್ತು.. ನನ್ನ ಮನ ಕುಣಿದಿತ್ತು.. ಹಾಗೇ ನಿನ್ನ ಜೊತೆಗಿನ ಬಾಂಧವ್ಯ ಬೆಳೆದಿತ್ತು...

 ಒಂದೂವರೆ ವರ್ಷದ ಬಳಿಕ ನಮ್ಮಿಬ್ಬರ ಮಾತುಕತೆ ವಾಟ್ಸ್​ಅ್ಯಪ್​ ವರೆಗೂ ತಲುಪಿಬಿಟ್ಟಿತ್ತು.. ನನಗಿನ್ನೂ ನೆನಪಿದೆ ಏಪ್ರಿಲ್​ 30.. ಮಧ್ಯಾಹ್ನ 12.05ಕ್ಕೆ ನಾನು ನಿನ್ನ ಮೊದಲ ಬಾರಿ ಭೇಟಿ ಮಾಡಿದ್ದೆ.. ನನ್ನ ಬರುವಿಕೆಗೆ ಕಾಯ್ತಾ ಇದ್ದ ನೀನು ಬಿಸಿಲಿನ ತಾಪದಿಂದ ಬಚಾವಾಗಲಿ ಮರದ ಕೆಳಗೆ ಇದ್ದ ಕಲ್ಲು ಬೆಂಚ್​ನಲ್ಲಿ ಕುಳಿತಿದ್ದೆ.. ದೂರದಲ್ಲೇ ಬರ್ತಿದ್ದ ನನ್ನ ಬೈಕ್​ ನೋಡಿ ಈತನಿರಬಹುದೋ ಎಂದು ಯೋಚಿಸಿದೆ ಎಂದು ನಾನು ಅಂದುಕೊಂಡೆ.. ಹೆಲ್ಮೆಟ್​ ಧರಿಸಿ ಬರುತ್ತಿದ್ದ ನನ್ನ ಮೊದಲಬಾರಿ ಮುಖತಃ ಭೇಟಿಯಾಗುತ್ತಿರುವ ನಿನಗೆ ಅದು ಸಹಜ ಯೋಚನೆ.. ಪ್ರಥಮ ಭೇಟಿಯ ವೇಳೆ ಅದೆಷ್ಟೊ ಸುಮಧುರ ಮಾತುಕತೆ ಹರಟೆ, ಸಿನಿಮಾ, ಕೊನೆಯಲ್ಲಿ ಐಸ್​ಕ್ರೀಂ.. ತುಂಬಾ ಇಷ್ಟವೂ ಆದೆ ನೀನು.. ಅತ್ಯಂತ ಮರೆಯಲಾಗದ ಘಟನೆ ನೀನೇ ಕೇಳಿ ಪಡೆದ ಆ ಸೆಲ್ಫಿ ಚಿತ್ರ.. ಇಂದಿಗೂ ನನ್ನ ಕಂಪ್ಯೂಟರ್​ನ 'ಪ್ರೇಶಿಯಸ್​' ಇನ್ನೋ ಫೋಲ್ಡರ್​ನಲ್ಲಿ ಭದ್ರವಾಗಿದೆ..
ಆ ಭೇಟಿಯ ಕೊನೆಯಲ್ಲಿ ಮತ್ತೆ ಮುಂದಿನ ತಿಂಗಳು ಸಿಗುವ ಅಂತ ನಾನು ಹೇಳಿದ್ರೆ, ನಿನ್ನ ಕಂಗಳಲಿ ಇದ್ದ ಮಿಂಚು, ಜಿನುಗಿನ ಕಣ್ಣೀರು ಅದೆಷ್ಟು ಪ್ರೀತಿ ಇಟ್ಟಿರುವೆ ನನ್ನ ಮೇಲೆ ಎಂಬುದನ್ನು ಸೂಚಿಸುವಂತಿತ್ತು..

 ಇಷ್ಟರ ಬಳಿಕ ನಾನು ನೀನು ಇಡೀ ವರ್ಷದಲ್ಲಿ ಮತ್ತೆ 3 ಬಾರಿ ಭೇಟಿಯಾದ್ವಿ. ಪ್ರತೀ ಭೇಟಿಯೂ ಸಂತಸ ಸಂಭ್ರಮ ಸ್ನೇಯಮಯವಾಗಿತ್ತು.. ನನ್ನ ಮನಸು ನಿನಗಾಗಿ ಹಾತೊರೆಯುತ್ತಿದೆ ಅನ್ನೋದು ನಿನಗೆ ತಿಳಿದಿತ್ತು..

 ಹೌದು ನನಗೆ ನೀನು ನನ್ನ ಮನದ ದೇವತೆಯೇ ಆಗಿದ್ದೆ.. ನಾನು ಆ ಹೊತ್ತಿಗಾಗಲೇ ನಿನಗಾಗಿ ಬದುಕಲು ಪ್ರಾರಂಭಿಸಿದ್ದೆ. ನಿನ್ನ ಇಷ್ಟ ಕಷ್ಟಗಳು ನಡುವೆ ನನ್ನ ಬಯಕೆಗಳನ್ನೇ ಮರೆತಿದ್ದೆ.. ನಿಜ ನಿನ್ನ ಬಿಟ್ಟು ಜೀವನ ಇಲ್ಲ ಅನ್ನೋದು ಮನಸಿಗೆ ಬಂದಿತ್ತು..
ಆದರೆ ಅದ್ಯಾರ ಕಣ್ಣು ಬಿತ್ತೋ.. ಅದ್ಯಾರು ನನ್ನ ಬಗ್ಗೆ ಏನು ಹೇಳಿದ್ರೋ.. ನನ್ನ ವ್ಯಕ್ತಿತ್ವವನ್ನೇ ಅನುಮಾನಿಸತೊಡಗಿದೆ.. ಪ್ರೀತಿಯ ಬಟ್ಟಲಲಿ ಶಂಕೆಯ ಕಲ್ಲು ಬಿದ್ದಿತ್ತು. ನನ್ನ ಬದುಕಲಿ ಅದೆಷ್ಟೋ ಲಲನೆಯರು ಬಂದು ಹೋಗಿದ್ದಾರೆಂಬಂತೆ ನನ್ನ ನೋಡತೊಡಗಿದೆ.. ನನ್ನಲಿ ಎಲ್ಲವೂ ನಿನಗೆ ಆಕ್ಷೇಪಾರ್ಹವೇ ಆಗತೊಡಗಿತು.. ಇಷ್ಟಾದರೂ ನನಗೆ ನಿನ್ನ ಮೇಲಿನ ಒಲುಮೆ ಪ್ರೀತಿ ಕುಗ್ಗಿಲ್ಲ.. ಆದ್ರೆ ಅದನ್ನು ತೋರ್ಪಡಿಸುವುದನ್ನು ನಿಲ್ಲಿಸದೇ ನನಗೆ ಬೇರೆ ದಾರಿಯೇ ಇರಲಿಲ್ಲ..

 ಪ್ರೀತಿಸುವ ಹೃದಯಗಳ ಮಧ್ಯೆ 'EGO' ಇರಬಾರದು.. ಅನುಮಾನವಂತೂ ಸುಳಿಯಲೇಬಾರದು.. ಬಹುಷಃ ನಾನು ನಿನ್ನನ್ನು ಇಷ್ಟಪಟ್ಟಷ್ಟು ಸ್ವತಃ ನನ್ನನ್ನೇ ಇಷ್ಟ ಪಟ್ಟಿಲ್ಲ ಅನ್ನಿಸುತ್ತೆ.. ಇದು ನಿನ್ನ ಕಣ್ಣಿಗೆ ಕಾಣಲೇ ಇಲ್ಲ.. ಅನುಮಾನದ ಸುಳಿಗೆ ಬಿದ್ದು ನನ್ನ ದೂರದವನಂತೆ ನೋಡತೊಡಗಿದೆ. ನಿನ್ನ ಪ್ರತಿ ಕಟುನುಡಿಗೆ ನನ್ನ ಮನ ಮೌನಿಯಾಗತೊಡಗಿತು. ಕಟ್ಟಿದ್ದ ಪ್ರೇಮಸೌಧ ನಿನ್ನ ಕಟು ಮಾತಿನ ಭೂಕಂಪನಕೆ ಕುಸಿದುಬಿತ್ತು...

 ಕುಸಿದ ಒಲವ ಗೋಪುರದಡಿ ಸಿಲುಕಿ ನರಳುತ್ತಿರುವ ನಾನು ಇಂದಿಗೂ ಹೇಳುತ್ತಿರುವುದಿಷ್ಟೇ.. ನೀನೆಂದೂ ನಿಜವಾದ ನನ್ನ ನೋಡೇ ಇಲ್ಲ...!! 

ಮೂಡಿ ಬಾ ಮಿನುಗುತಾರೆ...

ಆಗಸದಿ ಕಂಡ ಮಿನುಗುವ ಚುಕ್ಕಿಗೆ
ಬಯಸಿ ಮನದಲೇ ಬಚ್ಚಿಟ್ಟು ಪ್ರೇಮಿಸಿದೆ
ನಕ್ಷತ್ರ ನೀ ಎನ್ನ ಪಾಲಿನ ದೇವತೆ ಎಂದು
ಬಾಯ್ತುಂಬ ದೂರದಿಂದಲೇ ಸಿಹಿನುಡಿದೆ
ಎಂದೂ ಇರದ ಆನಂದರ ಭಾವನೆಗೆ
ಅಧಿಪತಿ ನಾನೆಂದು ಸಂಭ್ರಮವ ನಾ ಉಂಡೆ
ಜಗಕೆಲ್ಲ ಮಿನುಗುತಾರೆ ಕಂಡರೂ, ಅದು
ಎನ್ನ ಮಾತ್ರ ನೋಡಿ ಮುಗುಳು ನಗುತಿತ್ತು

ಸಂತಸದ ಕ್ಷಣಗಳು ಸಾಗಿರಲು ಇರುಳು ಕಳೆದಿತ್ತು
ಮೂಡಣದಿ ಸೂರ್ಯನ ಕಿರಣ ಸಾಗಿ ಕತ್ತಲ ವಧಿಸಿತ್ತು

ನನ್ನ ಮನದಿ ಆರಿದ್ದ ಸಂತಸ ಚಿಗುರಿಸಿದ್ದ
ಮಿನುಗುತಾರೆ ಬಿಳಿ ಆಗಸದಿ ಕಣ್ಮರೆಯಾಗಿತ್ತು
ಆದರೆ ಕನಸ ಗೋಪುರದಿ ತಾರೆ ಮತ್ತೆ
ನಾಳೆಯ ಪ್ರಜ್ಞೆ ಮೂಡಿಸಿ ಕಾಯಿಸಿತ್ತು

ಮತ್ತೆ ತಣ್ಣನೆಯ ಇರುಳು ಬರುತ್ತೆ ಅನ್ನೋ ಭರವಸೆ
ಅಧಮ್ಯ ನಂಬಿಕೆಯ ಜೊತೆ ಹೃದಯವಿದು ಕಾದಿತ್ತು
ಆದರೆ ಕಾಯುವ ಪ್ರತಿಕ್ಷಣ ಒಂಟಿ ಎಂಬ ನಿಜಭಾವ
ಮನವ ಕಲಕಿ ತುಸು ಹಿಂಡಿ ಹಿಂಡಿ ಹಿಪ್ಪೆ ಮಾಡಿತ್ತು

ಪ್ರೀತಿ ತಪ್ಪಲ್ಲ ಅಂತ ಜಗವೇ ಸಾರಿ ಹೇಳುತ್ತೆ..
ಆದರೂ..
ಮಾಡದ ತಪ್ಪಿಗೆ ಮನ ನೋಯುತಿದೆ.. ಕಣ್ಣು ತೋಯುತಿದೆ..
ಹೃದಯವಿದು ಮಡಿಯುತಿದೆ..
ಮತ್ತೆ ಇರುಳಿಗೆ ಕಾಯುವ ಎನಗೆ ಮನದಲಿ ಒಂದೇ ಬಯಕೆ
ಎನ್ನ ಮನದ ಆಗಸದಿ ಮೂಡಿ ಬಾ ಮಿನುಗುತಾರೆ....

- ವರುಣ್​ ಕಂಜರ್ಪಣೆ

ಎನಿತು ಪ್ರೀತಿಯ ನೀಡಲಿ ನಿನಗೆ...

ಎನಿತು ಪ್ರೀತಿಯ ನೀಡಲಿ ನಿನಗೆ...

ಎನಿತು ಪ್ರೀತಿಯ ನೀಡಲಿ ನಿನಗೆ
ಓ ನನ್ನ ಪ್ರೇಯಸಿ..

ಕಾದಿರುವ ಹೃದಯದಿ ಮೂಡಿರುವ
ಪುಟ್ಟ ಕವನದ ಸಾಲ ಹಾಡಿ ಹೇಳಲೇ..
ಕಣ್ತುಂಬ ನಿನ್ನ ಕಾಣೋ ಬಯಕೆ
ತುಂಬಿರುವ ಕಂಗಳಲೇ ಹೇಳಲೇ.

ಇರುಳ ಆಗಸದಿ ಮೂಡಿ ಹೊಳೆವ
ಅದೆಷ್ಟೋ ಚುಕ್ಕಿಗಳ ಚಿತ್ತಾರ ಬಿಡಿಸಲೇ..
ಬೀಸುವ ಗಾಳಿಗೆ ತಲೆದೂಗಿ ನರ್ತಿಸಿ
ಹಾಡುವ ಮರಗಳ ಗಾನ ತಂದಿಡಲೇ..

ಮೂಡಣದ ಮೋಡಗಳ ರಾಶಿಗೆ
ರಂಗಿತ್ತು ಕುಂಚದಿ ಹೃದಯವ ಬಿಡಿಸಲೇ..
ಎನಿತು ಪ್ರೀತಿಯ ನೀಡಲಿ ನಿನಗೆ
ಓ ನನ್ನ ಪ್ರೇಯಸಿ..

- ವರುಣ್​ ಕಂಜರ್ಪಣೆ

ಪ್ರೇಮ ಬಲಿತಾಗ

ಒಳಗೊಳಗೇ ಅವಿತ ಪ್ರೇಮ ಹೇಗೋ ಬಲಿತಿದೆ
ಅತ್ತ ಮುಚ್ಚಿಡಲಾಗದೆ ಇತ್ತ ತೆರೆದಿಡಲಾಗದೆ 
ಒಳಗೊಳಗೆ ಮಧುರ ಸಂಕಟ ನೀಡಿದೆ 

ಮಾತಲಿ ಮೌನವಾಗಿದೆ, ಮೌನದಲಿ ಪಿಸುಗುಟ್ಟಿದೆ 
ಮಳೆಗಾಳದಿ ಭೋರ್ಗರೆವ ಜಲಧಾರೆಯಂತೆ 
ಕಲ್ಪನೆಯ ಕಾವ್ಯವಾಗಿ ದುಮ್ಮಿಕ್ಕುತಿದೆ 

ಅದೆಷ್ಟು ದಿನ ಸ್ನೇಹದ ಪರಿಧಿ ಎಂಬ ಆಣೆಕಟ್ಟು 
ಎನ್ನೊಳಗಿನ ಒಲುಮೆಯ ಅಗಾಧ ಜಲಾಶಯವ 
ತಡೆಹಿಡಿದು ಕಾಪಾಡುತ್ತೋ ಹೃದಯದೇವನೇ ಬಲ್ಲ 

- ವರುಣ್  ಕಂಜರ್ಪಣೆ 

ಒಮ್ಮೆ ನೀ ಉತ್ತರಿಸಿಬಿಡು

ಎನ್ನೆದೆಯಲಿ ರಂಗು ಮೂಡಿಸಿದ ಮದರಂಗಿ ಆಕೆ
ಬದುಕಿನ ಕಾನನದಿ ಚಿತ್ತಾರ ಬರೆದ ಕಾಮನಬಿಲ್ಲು ಆಕೆ
ಮನದ ಗೂಡಲಿ ಸಂತಸದ ಸಂಗೀತವ ಗುನುಗಿದವಳು ಆಕೆ
ಕಣ್ರೆಪ್ಪೆ ಮುಚ್ಚಿದಾಗ ಬರೋ ಸುಂದರ ಚಿತ್ರದಲೂ ಇರವಳು ಆಕೆ
ಕೇಳಬೇಕೆಂದಿರುವೆ ಯಾವಾಗ ನೀ ಬಳಿಸಾರಿ ಬಂದು ಆಗುವೆ...? ನನ್ನಾಕೆ !

ಒಂದು ಕನಸು - ಹಾಳಾದ ಮನಸು

ಗಾಢ ನಿದ್ರೆಯಲ್ಲಿದ್ದ ಎನಗೆ 
ಕನಸಿನ ಪರದೆಯಲಿ ಬಂದಿದ್ದಳಾಕೆ.. 
ಆಕೆ ಕನಸಿಲಿ ಎನ್ನ ಮುದ್ದಿಸಿ ಇತ್ತ ಒಂದು ಮುತ್ತು 
ಎನ್ನ ಗರಬಡಿದವನಂತೆ ಒಂದೇ ಸಾರಿ ಎಬ್ಬಿಸಿತ್ತು... 

ಮಾತೇ ಹೊರಬರುತ್ತಿರಲಿಲ್ಲ.. 
ಹರುಷವೋ, ಮುನ್ಸೂಚನೆಯೋ.. 
ಸವಿಯಾದ ಹುಸಿಗನಸೋ ತಿಳಿಯುತಿಲ್ಲ... 

ಆಕೆಗೂ ಒಂದಿಲ್ಲೊಂದು ದಿನ.. 
ಇಂತಹುದೇ ಕನಸು ಬಿದ್ದಿರಬಹುದೇನೋ ಅನ್ನುವ
ಕುತೂಹಲ ಕೂಡ ತಣಿಯುತಿಲ್ಲ... 

ಹಾಗಂತ ನಿನಗೂ ಈ ರೀತಿ
ಸಿಹಿಗನಸು ಬಿದ್ದಿತ್ತೇ ಎಂದು ಕೇಳೋಣವೆಂದರೆ
ಹಾಳಾದ ಧೈರ್ಯವೇ ಸಾಲುತಿಲ್ಲ 

- ವರುಣ್ ಕಂಜರ್ಪಣೆ 

ಸಿಹಿ ಮಿಡಿತ

ಆಕೆಯ ಕಂಡೊಡನೆ ಕಣ್ಣೆರಡು ಮಿಂಚ ಹರಿಸಿತ್ತು
ಒಳಗೊಳಗೇ ಮನದ ಹಕ್ಕಿ ಬಾಂದಳವ ತಲುಪಿತ್ತು
ಹೃದಯವದು ಒಲುಮೆಗೀತೆಯ ಸೃಷ್ಟಿಸಿತ್ತು
ಕಂಠದಾಳದಿ ಖುಷಿಯ ರಾಗ ಮೂಡಲು ಸಿದ್ದವಾಗಿತ್ತು
ಹತ್ತಾರು ಜನುಮದ ಕನಸು ಎಳೆ ಎಳೆಯಾಗಿ ಕಾಣತೊಡಗಿತ್ತು
ಕಿವಿಯಂಚಲಿ ಆಕೆಯ ಹೆಜ್ಜೆ ದನಿ ಮೊರೆಯುತ್ತಿತ್ತು

ಮೈಮರೆತ ಭಾವಗಳ ಗುಂಗಿಗೆ ಒಳಗಿನ ಪ್ರಜ್ಞೆ ಕೂಗಿ ಹೇಳಿತ್ತು
ಮನದಾಳದ ಮಾತುಗಳೆಲ್ಲ ದನಿಯಾಗೋದಿಲ್ಲ....
ಕಂಡ ಕನಸುಗಳೆಲ್ಲಾ ನನಸಾಗೋದಿಲ್ಲ....
ಆದರೂ ಹೃದಯದ ಸಿಹಿ ಮಿಡಿತ ಕಡಿಮೆಯಾಗಲೇ ಇಲ್ಲ !!

- ವರುಣ ಕಂಜರ್ಪಣೆ.

ಹುಚ್ಚು ಪ್ರೀತಿ - ಇದೇ ರೀತಿ

ಹುಚ್ಚು ಪ್ರೀತಿ - ಇದೇ ರೀತಿ

ಅಂದು
ನೀನೆಷ್ಟು ಒಳ್ಳೆಯವನೆಂದು ಮೆದುವಾಗಿ ಮುಖ ಮುಟ್ಟಿ
ಬಾಚಿ ತಬ್ಬಿಕೊಂಡ ಆಕೆ,
ಮನದಲೇ ತನ್ನಿಂದ ನಿನಗೆ ಎಲ್ಲಿ ನೋವಾಗಬಹುದೋ
ಎಂದು ನೊಂದುಕೊಂಡ ಆಕೆ,
ಪ್ರತೀ ಮಾತಲು ಖುಶಿ ಹುಡುಕಿ ಮನದಲೇ
ಮುದಗೊಂಡ ಆಕೆ,
ಎಂದೂ ಬತ್ತದ ಜೀವ ಸೆಲೆಯಂತೆ ಮುತ್ತಿಟ್ಟು
ಎದೆಯೋಳಗಿಳಿದ ಆಕೆ,


ಇಂದು
ತುಂಬಾ ಒಳ್ಳೆಯವನಾದ ನೀನು ಎನ್ನ ಒಲವ
ಪಡೆಯಲಾರೆ ಎಂದು ಖಟು ನುಡಿದಳಾಕೆ.
ಖುಶಿಯ ಬಟ್ಟಲಲಿ ಹೇಗೋ ದ್ವೇಷದ ಕಲ್ಲ ಹುಡುಕಿ
ಎದೆ ಬಗಿದು ಜೀವವ ಪಾತಾಳಕೆ ಹುಗಿದು ಹೋದಳಾಕೆ.

ಆದರೂ ಎದೆಯಲಿ ಬತ್ತಿಲ್ಲ ಈ ಹುಚ್ಚು ಪ್ರೀತಿ
ನೆನಪಿನಂಚಲಿ ಅಚ್ಚಳಿಯದೆ ನಿಂತಿದೆ ಅದ ಆಕೆ ಕೊಟ್ಟ ರೀತಿ.
ಬದುಕು ಬರಡಾಗೋ ಮೊದಲು ಅನುರಾಗದ ಸೋನೆ
ಮತ್ತೆ ಸುರಿಯುವ ಆಸೆ ಮಾತ್ರ ಇನ್ನೂ ಹಸಿರಾಗೇ ಇದೆ.

ಮುರುಕು ಮನೆಯ ಮುದುಕ

ಆ ಮುರುಕು ಮನೆಯ ಮುದುಕ ಆಗಸದ ಅಂಚಲಿ ಮಾಸಿದಂತೆ ಕಂಡ, ಕಹಿ ಶಕುನ ನುಡಿದ ಚುಕ್ಕಿಯ ಕಂಡು ವ್ಯಂಗ್ಯದಿಂದ ಮುಗುಳ್ನಕ್ಕನಂತೆ. ಮಾಸಿದ ಚುಕ್ಕಿ ನಾಳೆ ಮತ್ತೆ ಬೆಳಗುತ್ತೆ, ಆದ್ರೆ ಪಾಪ ಮುದುಕ !!!

ಚೆಲುವೆ ಯಾಕೆ ಬಂದೆ ನನ್ನ ಕಣ್ಣ ಮುಂದೆ - 2

ಸುತ್ತಲೂ ಮಬ್ಬಿರಲು 

ಮನದೊಳಗೆ ಕಹಿಯಿರಲು

ಸುಲಿಯೊಳಗೆ ಸಿಲುಕಿರಲು

ದನಿ ಆಳದಿ ಅಡಗಿರಲು

ನೆನಪುಗಳು ಕಾಡಿರಲು 

ಮತ್ತದೇ ಪ್ರಶ್ನೆ

ಚೆಲುವೆ ಯಾಕೆ ಬಂದೆ ನನ್ನ ಕಣ್ಣ ಮುಂದೆ.. ??

ಹುಡುಕಾಟ

ಬಚ್ಚಿಟ್ಟ ಭಾವನೆಗಳ ಭವಣೆ ಇನ್ನೆಷ್ಟು ದಿನ ಎನ್ನ ಕಿತ್ತು ತಿನ್ನುವುದೋ ?

ಖಾಲಿಯಾಗೇ ಖಯಲಿಯಾಗಿದ್ದ ಮನಕೆ ಮಾರುಹೋಗಿ ಬಂದವರು ಮರೆಯಾದರೇಕೆ ?

ಸುತ್ತಲಿನ ಜಗದಿ ಸುತ್ತುವ ಎನಗೆ ಸುತ್ತಿ ಸುತ್ತಿ ಬರುವ ನೆನಪಿನ ನಂಟು ಎಷ್ಟೋ ?

ಮಾತಲ್ಲೇ ಮತ್ತೆರಿಸೋ ಜೀವ ತಾನೇ ಮರುಕಿದರೆ ಅದ ಮುದ್ದು ಮಾಡುವವರು ಯಾರೋ ?

ಕಲ್ಪನೆಯ ಕಾನನದಿ ಕಣ್ಣಾಡಿಸಿದ ಮೇಲೆ ಕಂಡ ನಿಜಗಳ ತಾ ಜೀರ್ಣಿಸಿಕೊಳ್ಳುವುದೆನ್ತ್ಹೋ ?

ಇದೆಲ್ಲ ಪ್ರಶ್ನೆಗಳ ಪಾಳಿಗೆ ಬಿದ್ದವನ ಪಾಡು ನೋಡಿ ಒತ್ತಾಸೆ ಕೊಡುವ ಪುಟ್ಟ ಮನಸ್ಯಾವುದೋ ??

ಅದು ಪುಟ್ಟ ಹಕ್ಕಿ

ಅದು ಪುಟ್ಟ ಹಕ್ಕಿ !!

ಮುಗಿಲ ಮಂಟಪಕೆ ನೋಡ ನೋಡುತ್ತಾ ಕಪ್ಪು ಛಾಯೆ ಬಂದು ಅಂಟಿಕೊಂಡು ಸುಳಿದಾಡುತ್ತಿದೆ,

ಭಾನ್ದಲದ ಅಂಚಲಿ ಗುಡುಗು ಸಿಡಿಲು ಹಟಕ್ಕೆ ಬಿದ್ದವರಂತೆ ಮತ್ತೆ ಮತ್ತೆ ಮಾರ್ದನಿಸುತ್ತಿದೆ,

ಅದೆಲ್ಲೋ ಚಳ್ಹ್ ಎಂದು ಕಂಗೊಳಿಸಿ ಮರೆಯಾಗೋ ಕೋಲ್ಮಿಂಚುಗಳ ಜುಗಲಬಂದಿಯಾಗುತಿದೆ,

ಮರಗಿಡಗಲೋ ಸಾಲು ಸಾಲಾಗಿ ಗಾಳಿಯ ಜತೆ ಸೇರಿ ಮತ್ತೆರಿದಂತೆ ಬಳುಕಾಡಿ ನರ್ತಿಸುತ್ತಿದೆ,

ಮನುಜನೋ ಎಲ್ಲದಿಕ್ಕು ನಾ ಸೈ ಎಂಬಂತೆ ಬೆಚ್ಚನೆ ಮನೆ ಸೇರಿಕೊಂಡಂತೆ ಭಾಸವಾಗುತಿದೆ,

ಬಹು ಕಾಲದಿಂದ ತ್ರುಷೆಯಾಗಿ ಬಳಲಿದ ಭುವಿ ಆಸೆಯಿಂದ ವರುಣನ ಬಾ ಬಾ ಎಂದಂತಿದೆ ,

ಆದರೆ ಅದು ಪುಟ್ಟ ಹಕ್ಕಿ,

ಗೂಡು ಮರಿ ತೊಯ್ದು ಮರುಕುವವು ಎಂದು ದೂರದ ಕಂಬದ ಮೇಲೆ ಕುಳಿತು,

ಮಳೆರಾಯ ಸ್ವಲ್ಪದಿನ ಬರದಿರು ಎಂದು ಒಂದೇ ಸಮನೆ ಅಂಗಲಾಚುತಿದೆ.

                                                                                     - ವರುಣ್ ಕಂಜರ್ಪಣೆ.

ಚೆಲುವೆ ಯಾಕೆ ಬಂದೆ ನನ್ನ ಕಣ್ಣ ಮುಂದೆ

ಚೆಲುವೆ ಯಾಕೆ ಬಂದೆ ನನ್ನ ಕಣ್ಣ ಮುಂದೆ...???

ಚೆಲುವೆ ಯಾಕೆ ಬಂದೆ ನನ್ನ ಕಣ್ಣ ಮುಂದೆ....

ನಾಲ್ಕಾರು ದಿನಗಳ ಕೆಳಗೆ ನಿನ್ನ ಚಿತ್ರಪಟ ಕಂಡು,

ಅದೇಕೋ ಏನೋ ಮುಗುಳ್ನಕ್ಕಿತು ನನ್ನ ಮನದ ಹಕ್ಕಿ.

ಬಾಯ್ತುಂಬ ಮಾತನಾಡಿ ಮುದಗೊಂಡಿತು ನನ್ನೀ ಎದೆಗೂಡು.

ಕಂಡಿರಲಿಲ್ಲ ನಿನ್ನ ಜತೆ ಓಡಾಡಿರಲಿಲ್ಲ ಒಂದೇ ಒಂದು ದಿನ,

ಮತ್ತೆ ಮತ್ತೆ ನಿನ್ನ ಮೊದಲ ಬಾರಿ ನೋಡೋ ಹಂಬಲ ಮೂಡುತ್ತಿತ್ತು.

ಎಂದು ಕಾಣದ ನಿನ್ನ ನೋಡೋ ದಿನ ಹತ್ತಿರ ಬರುತಿತ್ತು, ಬಂದೆ ಬಂತು,

ನೂರಾರು ಮೈಲಿ ದೂರದ ನೀನು ಕಣ್ಣಮುಂದೆ, ರೋಮಾಂಚನ ಆ ಭಾವ.

ಪುಟ್ಟನೆಯ ಎದೆ ಗೂಡಲಿ ಬೆಚ್ಚನೆ ಭಾವಗಳು ಜೆಂಕರಿಸುವಂತೆ ನಿನ್ನ ಆ ಮುಗ್ದ ನಗುಮೊಗ,

ಎನ್ನೆದೆಯ ಭಾವ ಲಹರಿಗೆ ಇಂಬು ಕೊಟ್ಟಿತ್ತು.

ಜತೆಯಾಗಿ ಹಿತ ನುಡಿದು ಸಾಗೋ ಸಲಿಗೆ, ಗಾಳಿ ಬೀಸಿ ಬರಲು ನಿನ್ನ  ಮುಂಗುರುಳ  ಸ್ಪರ್ಶ,

ಎನ್ನಲಿ ಹರ್ಷದ ಕೋಡಿ ಹರಿಸಿತ್ತು,

ಇವೆಲ್ಲವುಗಳ ನಡುವೆ ಇದು ಕ್ಷಣ ಕಾಲದ ಸಂತಸ - ಆಸೆಯ ಬಿಸಿಲು ಕುದುರೆ ಅನ್ನೋ ಪ್ರಜ್ಞೆ ಕಾಡುತಿತ್ತು,

ಮತ್ತದೇ ಉತ್ತರವಿಲ್ಲದ ಪ್ರಶ್ನೆ, ಚೆಲುವೆ ಯಾಕೆ ಬಂದೆ ನನ್ನ ಕಣ್ಣ ಮುಂದೆ ??

- ವರುಣ್ ಕಂಜರ್ಪಣೆ.

ಬಣ ಬಣಿಸೋ ನನ್ನೀ ಮನ

ಅದೇನೋ ಸದ್ದು ಮತ್ತೆ ಮತ್ತೆ ಸುತ್ತಿ ಸುತ್ತಿ ಕಿವಿಗಳಿಗೆ ಅಪ್ಪಳಿಸುತಿದೆ,

ಮನದ ಆಗಸದ ತುಂಬ ದುಗುಡದ ಕಾರ್ಮೋಡಗಳು ಹಬ್ಬುತಿದೆ,

ಕಂಗಳು ಮತ್ತು ಮನ ತಾ ಮುಂದು ನಾ ಮುಂದು ಎಂದು ಚಂಚಲಿಸುತ್ತಿದೆ,

ಸುತ್ತ ಮುತ್ತಲಿನ ಆ ಜನ ಸುಮ್ಮನಿದ್ದರು ಏನೋ ಕೊಂಕಾಡಿದಂತೆ ಭಾಸವಾಗುತ್ತಿದೆ,

ಎಲ್ಲವನು ಉಲಿದು ದೂರ ಸಾಗೊಣವೆಂಬ ಆಸೆಯು ಉಸಿರು ಬುಸುಗುಟ್ಟುತಿದೆ,

ಕಂಗಳು ಕೂಡ ದೋ ಎಂದು ಸುರಿಯುವ ಮುನ್ನ ನಿನ್ನ ಚಿತ್ರಪಟ ಅಸ್ಪಷ್ಟ ಗೋಚರವಾಗುತಿದೆ,

ಕಂಡು ಮೌನ ವ್ರತ ತಾಳಿ ದೂರ ಸಾಗುತಿಹ ನಿನ್ನ ದಾರಿಯ ಕಂಡು ಉಸಿರು ಕೂಡ ನನ್ನ ಅಸ್ಪ್ರುಷ್ಯನಂತೆ ಮಾಡುತಿದೆ.

- ವರುಣ್ ಕಂಜರ್ಪಣೆ.

ಯಾಕೆ ಹೀಗೆ ??

ಬಾಳ ಸಲಿಗೆಯಲಿ ಪ್ರೀತಿಯಿದೆ,
ಅವಳ ನೆನಪಲಿ ಅದೇನೋ ಹಿತವಿದೆ,
ಪ್ರತಿ ಉಸಿರಲು ಅವಳ ಹೆಸರಿದೆ,
ಪ್ರೀತಿಯ ಎಲ್ಲ ಪದಗಳು ಅವಳಿಗೆ ಸಂದಿವೆ,
ನಾಕಾಣೆ ಯಾಕೆ ಈಗೀಗ ಅವಳ ಮನಸು,
ದೂರ ಬಹುದೂರ ಸಾಗಿ ಹಿಂತಿರುಗಿ ನಗುತಿದೆ.

-ವರುಣ್ ಕಂಜರ್ಪಣೆ.

ಪ್ರೀತಿಯ ರಸೀತಿ

ಮೌನವೆಂಬ ಸಾಗರದ ಅಂಚಲಿ ನಿಂತಿಹ ಎನಗೆ,
ಒಲವಿನ ಚಂದಿರ ಮೂಡಿದಾಗ ಅಂತರಂಗ ಉಲಿಯಿತು,
ಕಣ್ಣಲಿ ಆ ಚೆಲುವಿನ ಚಿತ್ರಪಟ ನಲಿದಾಡಿತು,
ಮತ್ತೆ ಮುಳುಗುವನೆಂಬ ಕಹಿ ಸತ್ಯ ಸುಳಿದಾಡಿತು,
ರೆಪ್ಪೆ ಕಪ್ಪೆ ಚಿಪ್ಪುಗಳಂತೆ ಒಂದನ್ನೊಂದು ಅಪ್ಪಿಕೊಂಡಿತು,
ಮನದ ಭಾವದ ರಸೀತಿಯಂತೆ ನಾಲ್ಕು ಹನಿಗಳು ನಯನಗಳ ತೋಯ್ದನ್ಥಾಯ್ತು.
-ವರುಣ್ ಕಂಜರ್ಪಣೆ.

ಅವಳ ನೆನಪು

ಜೀವ ಸೆಲೆಯಾಗಿ ನೆಲೆಯಿತ್ತ ಮನಸೀಗ,
ಕತ್ತಲಿನ ಬದುಕಲ್ಲಿ ಬಂಧಿಯಾಗಿಸಿ ದೂರ ಬಹು ದೂರ ಸಾಗಿದೆ.

ಜತೆ ನಡೆದು ಮತ್ತೆ ಸೇರುವ ಕನಸು ಸುಪ್ತವಾಗಿರಲು,
ಕೈ ಕಾಲು ದಣಿದು ಸೋತು ಇಳೆಯನು ಮುತ್ತಿಕ್ಕುತಿದೆ.

ಇಂದು ನಾಳೆಗಳ ನಡುವೆ ನಿನ್ನೆಯ ಸುಂದರ ಸೊಬಗು,
ಮಸನದಾಚೆಯ ಸಿಹಿಯಾದ ಅಳಿಸಲಾಗದ ಕಾಡುವ ನೆನಪುಗಳ ಕಲೆಯಾಗಿದೆ.

-ವರುಣ್ ಕಂಜರ್ಪಣೆ.