Pages

Subscribe:

Friday, August 8, 2014

ಪ್ರೇಮ ಬಲಿತಾಗ

ಒಳಗೊಳಗೇ ಅವಿತ ಪ್ರೇಮ ಹೇಗೋ ಬಲಿತಿದೆ
ಅತ್ತ ಮುಚ್ಚಿಡಲಾಗದೆ ಇತ್ತ ತೆರೆದಿಡಲಾಗದೆ 
ಒಳಗೊಳಗೆ ಮಧುರ ಸಂಕಟ ನೀಡಿದೆ 

ಮಾತಲಿ ಮೌನವಾಗಿದೆ, ಮೌನದಲಿ ಪಿಸುಗುಟ್ಟಿದೆ 
ಮಳೆಗಾಳದಿ ಭೋರ್ಗರೆವ ಜಲಧಾರೆಯಂತೆ 
ಕಲ್ಪನೆಯ ಕಾವ್ಯವಾಗಿ ದುಮ್ಮಿಕ್ಕುತಿದೆ 

ಅದೆಷ್ಟು ದಿನ ಸ್ನೇಹದ ಪರಿಧಿ ಎಂಬ ಆಣೆಕಟ್ಟು 
ಎನ್ನೊಳಗಿನ ಒಲುಮೆಯ ಅಗಾಧ ಜಲಾಶಯವ 
ತಡೆಹಿಡಿದು ಕಾಪಾಡುತ್ತೋ ಹೃದಯದೇವನೇ ಬಲ್ಲ 

- ವರುಣ್  ಕಂಜರ್ಪಣೆ 

Monday, July 7, 2014

ಒಮ್ಮೆ ನೀ ಉತ್ತರಿಸಿಬಿಡು

ಎನ್ನೆದೆಯಲಿ ರಂಗು ಮೂಡಿಸಿದ ಮದರಂಗಿ ಆಕೆ
ಬದುಕಿನ ಕಾನನದಿ ಚಿತ್ತಾರ ಬರೆದ ಕಾಮನಬಿಲ್ಲು ಆಕೆ
ಮನದ ಗೂಡಲಿ ಸಂತಸದ ಸಂಗೀತವ ಗುನುಗಿದವಳು ಆಕೆ
ಕಣ್ರೆಪ್ಪೆ ಮುಚ್ಚಿದಾಗ ಬರೋ ಸುಂದರ ಚಿತ್ರದಲೂ ಇರವಳು ಆಕೆ
ಕೇಳಬೇಕೆಂದಿರುವೆ ಯಾವಾಗ ನೀ ಬಳಿಸಾರಿ ಬಂದು ಆಗುವೆ...? ನನ್ನಾಕೆ !

Friday, June 20, 2014

ಒಂದು ಕನಸು - ಹಾಳಾದ ಮನಸು

ಗಾಢ ನಿದ್ರೆಯಲ್ಲಿದ್ದ ಎನಗೆ 
ಕನಸಿನ ಪರದೆಯಲಿ ಬಂದಿದ್ದಳಾಕೆ.. 
ಆಕೆ ಕನಸಿಲಿ ಎನ್ನ ಮುದ್ದಿಸಿ ಇತ್ತ ಒಂದು ಮುತ್ತು 
ಎನ್ನ ಗರಬಡಿದವನಂತೆ ಒಂದೇ ಸಾರಿ ಎಬ್ಬಿಸಿತ್ತು... 

ಮಾತೇ ಹೊರಬರುತ್ತಿರಲಿಲ್ಲ.. 
ಹರುಷವೋ, ಮುನ್ಸೂಚನೆಯೋ.. 
ಸವಿಯಾದ ಹುಸಿಗನಸೋ ತಿಳಿಯುತಿಲ್ಲ... 

ಆಕೆಗೂ ಒಂದಿಲ್ಲೊಂದು ದಿನ.. 
ಇಂತಹುದೇ ಕನಸು ಬಿದ್ದಿರಬಹುದೇನೋ ಅನ್ನುವ
ಕುತೂಹಲ ಕೂಡ ತಣಿಯುತಿಲ್ಲ... 

ಹಾಗಂತ ನಿನಗೂ ಈ ರೀತಿ
ಸಿಹಿಗನಸು ಬಿದ್ದಿತ್ತೇ ಎಂದು ಕೇಳೋಣವೆಂದರೆ
ಹಾಳಾದ ಧೈರ್ಯವೇ ಸಾಲುತಿಲ್ಲ 

- ವರುಣ್ ಕಂಜರ್ಪಣೆ 

Thursday, February 27, 2014

ಸಿಹಿ ಮಿಡಿತ

ಆಕೆಯ ಕಂಡೊಡನೆ ಕಣ್ಣೆರಡು ಮಿಂಚ ಹರಿಸಿತ್ತು
ಒಳಗೊಳಗೇ ಮನದ ಹಕ್ಕಿ ಬಾಂದಳವ ತಲುಪಿತ್ತು
ಹೃದಯವದು ಒಲುಮೆಗೀತೆಯ ಸೃಷ್ಟಿಸಿತ್ತು
ಕಂಠದಾಳದಿ ಖುಷಿಯ ರಾಗ ಮೂಡಲು ಸಿದ್ದವಾಗಿತ್ತು
ಹತ್ತಾರು ಜನುಮದ ಕನಸು ಎಳೆ ಎಳೆಯಾಗಿ ಕಾಣತೊಡಗಿತ್ತು
ಕಿವಿಯಂಚಲಿ ಆಕೆಯ ಹೆಜ್ಜೆ ದನಿ ಮೊರೆಯುತ್ತಿತ್ತು

ಮೈಮರೆತ ಭಾವಗಳ ಗುಂಗಿಗೆ ಒಳಗಿನ ಪ್ರಜ್ಞೆ ಕೂಗಿ ಹೇಳಿತ್ತು
ಮನದಾಳದ ಮಾತುಗಳೆಲ್ಲ ದನಿಯಾಗೋದಿಲ್ಲ....
ಕಂಡ ಕನಸುಗಳೆಲ್ಲಾ ನನಸಾಗೋದಿಲ್ಲ....
ಆದರೂ ಹೃದಯದ ಸಿಹಿ ಮಿಡಿತ ಕಡಿಮೆಯಾಗಲೇ ಇಲ್ಲ !!

- ವರುಣ ಕಂಜರ್ಪಣೆ.